प्रहरीले १० केजी ५ सय ग्राम गाँजासहित निजगढको एक दम्पतिलाई रौतहटको कटहरियाबाट हिजो पक्राउ गरेको छ ।

जिल्लाको कटहरिया नगरपालिका स्थित अस्थायी प्रहरी पोष्ट छेदी चोकबाट खटिएको प्रहरी गस्ती टोलीले अटो चालक निजगढ नगरपालिका वडा नम्बर १ बनस्थली हाट बजार टोलका वर्ष ४२ का अनन्त बराइली र उनको श्रीमती वर्ष ३५ की मन्जु बराइलीलाई गाँजासहति पक्राउ गरेको हो ।

विशेष सूचनाको आधारमा प्रहरीले जंगलसहियाबाट कटहरियातर्फ जादै गरेको प्र.२–०३–००१ ह ३१५ नम्बरको अटोलाई चेकजाँच गर्दा चालक बराइली बसेको सिटमुनि रातो झोलामा लुकाई राखेको १० किलो ५ सय ग्राम गाँजा फेला पारेको थियो । बरामद गाँजा, अटो र अटोमा सवार मानिसहरुलाई नियन्त्रणमा लिई आवश्यक कारबाहीको लागि ईलाका प्रहरी कार्यालय गरुडा रौतहटमा राखेर थप अनुसन्धान भईरहेको प्रहरीले जनाएको छ ।